IWWER EIS

MAMERHAFF a.s.b.l.

Am Oktober 2015 ass de Veräin « Mamerhaff » a.s.b.l. vun 5 Grënnungsmemberen an d’Liewe geruff ginn. Dem Mamerhaff steet domatter e Veräin zur Säit, deen ënnerschiddlech organisatoresch Aufgaben erfëllen an ënnerstëtzerech wierke soll.

ENTWECKLUNG VUN DER IDEE

Wou mir fënnef am psycho-pädagogesche Beräich forméierte Fraen a Mammen eis 2013 déi éischte Kéier zesummegesat hunn, war séier kloer :

Mir wollten eis selbstänneg maachen, fir eppes Neies, Zäitgeméisses ze erschafen, fir ons eegen Ideeën an eppes Konkretem festzehalen an ausüben ze kënnen. Ausserdeem wollte mir eise Liewensmodell so gestalten, wéi et eise Grondwäerter am meeschten entsprécht.

Mir hunn eis de lëtzebuergesch psycho-sozio-pädagogesch Servicer ugekuckt a sinn an eisem Gefill bestäerkt ginn, dass dat, wat mir virhaten, an dëser Form zu Lëtzebuerg nach net ze fanne war.

No zwee Joer intensivem Plangen a regelméissegen Treffen konnte mir am Oktober 2015 de Veräin « Mamerhaff a.s.b.l. » grënnen. Eisen zukünftege Standuert war zu deem Zäitpunkt och schonn erausgesicht : d’ökologesch Sanéierung mat nohaltegen an héichwäertege Materialien vum ale Bauerenhaff « an Iewerts » zu Mamer war voll am Gaang. D’offiziell Erëffnung vum Mamerhaff fënnt am Januar 2017 statt, wann all Aarbechten um Gebai ofgeschloss sinn.

Aufgabe vum Veräin Mamerhaff a.s.b.l. :

> De Veräin lount d’Gebai « Mamerhaff » an entscheed, wéi eng Raimlechkeeten selwer genotzt ginn a wéi eng weider vermëttelt ginn.

> De Veräin hält sech un d’Zieler déi an de Statuten festgehale sinn.

> De Veräin entscheed iwwer Inhalter an Ofleef um Mamerhaff.

Déi 5 Grënnungsmemberen vun der Mamerhaff a.s.b.l. sinn entweder ugestallt vun der a.s.b.l. oder schaffen als Bénévole an der Institutioun. Si ënnerleie Regelungen, déi tëschen dem Veräin an de jeeweilege Persounen oder Angeboter bestinn, wéi och enger interner Charta.

Finanzéierungsmodi vum Mamerhaff duerch de Veräin Mamerhaff a.s.b.l. :

> Angeboter, déi sech selwer net droe kënnen, kënne vum Veräin finanziell ënnerstëtzt oder ganz gedroe ginn.

> D’Berodungsangebot gëtt duerch e finanziellen Ausgläichsystem organiséiert. Jee no finanzieller Situatioun vum Demandeur a jee no Finanzlag vum Veräin kënnen vergënschtegt Tariffer ugebuede ginn.

> D’internationaalt Konzept familylab.lu ass dann aus dësem Finanzéierungsmodell ausgeschloss, wann et sech em Angeboter handelt, bei deenen en Deel vum Ertrag un d’Organisatioun familylab association an un familylab international bezuelt muss ginn.

> D’Angeboter, déi momentan um Mamerhaff ugebuede ginn, gi momentan weder staatlech ënnerstëtzt nach vun engem Träger matfinanzéiert.

> Sollt sech un der Form vum Mamerhaff eppes änneren, wäert et héchstwahrscheinlech zu Verännerungen bei den Hëllefsleeschtungen vun der a.s.b.l. kommen. Op Ënnerstëtzung kann de Mamerhaff awer net verzichten.

Weiderliesen: Satzungstext Mamerhaff a.s.b.l (pdf)